උදර ප්‍රදේශය සිහින්ව හැඩට තිබීම ඔබේ සිරුරේ ආකර්ෂණිය පෙනුම තවත් වැඩිකරවයි.ශරීර ශක්තිය වැඩිකරගැනීමට වගේම මාංශ පේශී හොඳින් මූර්තිමත් කරගැනීම ද ව්‍යායාම හරහා බලාපොරොත්තුවෙනවා.කොතරම් ව්‍යායාම කළත් උදර ප්‍රදේශයේ පේශී මූර්තිමත් වී නොපෙනීම ඇතැම් අයට තිබෙන ගැටලුවක්.බොහෝ විට ඊට හේතුව පහත සඳහන් ඒවා අතරින් එකක් වෙන්නට ද පුළුවන්.
සිරුරේ ස්වභාවික මේද තට්‍ටු වලින් වැසීගොස් තිබීම
ශක්තිමත්ව වර්ධනය වී ඇතත් සිරුරේ පවතින ඝනකම් මේද තට්‍ටු නිසා මාංශ පේශී මතුපිටට නොපෙනිය හැකියි. ඔබේ 4 පැක්, 6 පැක් හෝ ඇතැම් විට 8 පැක් පවා බාහිරට කැපීනොපෙනෙන්නේ මේ හේතුව නිසයි.ව්‍යායාම හරහා අවසාන වශයෙන් මූර්තිමත් කෙරෙන පේශී කාණ්ඩය වන්නේ උදර පේශීයි.ඒ සඳහා දහනය වීමට ඒවා වටා අඩු මේද මට්ටමක් පැවතීම අවශ්‍ය වේ.කෙසේවෙතත් කාන්තා සිරුරේදී මේ තත්වය වඩාත් අභියෝගයක් වේ.ඊට හේතුව කාන්තා සිරුරේ මේද දහනය වීම වඩාත් මන්දගාමී ස්වභාවයක් ගැනීමයි. කෙසේවෙතත් සිරුරේ මේද අධික ලෙස අඩු මට්ටමක් ගැනීම වළක්වාගැනීම කාන්තා සෞඛ්‍ය සම්බන්ධයෙන් ඉතා වැදගත්ය. නැතිනම් අධික තෙහෙට්‍ටුව, ඔසප් චක්‍රය අක්‍රමවත් වීම වැනි අහිතකර අතුරු බලපෑම් මතුවීමේ ඉඩකඩ වැඩිවෙයි.නිසි පෝෂණවේදී උපදෙස් ද ලබමින් ව්‍යායාම වල යෙදීම වඩාත් සුදුසුය.
බඩපිපුම් තත්වයන් නිසා
ඇතැම් ආහාර පාන නිසා බඩපිපුම වැනි ගැටලු ඇතිවිය හැකියි.ඇතැම් විට ඔබේ ආමාශය නොඉවසන ආහාර පාන නිසා (ලැක්ටෝස් වැනි ඇතැම් සීනි,ග්ලූටන් වැනි) උදරයේ ගැටලු ඇතිවෙයි.ඉක්මනින් ආහාර ගැනීම සහ හුලං ගිලීයාම නිසා ද බඩ පිපෙන්නට පුළුවන්.පූර්ව ගර්භනී සමයේ දී ද හෝර්මෝන වෙනස්කම් නිසා බඩපිපුම හටගත හැකියි.ඔසප් චක්‍රයේ බලපැම් නිසා ද එසේ විය හැකියි.
උදර පේශී මූර්තිමත්ව නොපෙනෙන්නේ ඇතැම් හෝර්මෝනමය හේතු නිසා ද විය හැකියි
මෙය කාන්තා ශරීරයේ පවතින හෝර්මෝන වලට අතිශයින්ම අදාළයි.වැඩිහිටිවිය,ආතති මට්ටම් හෝ ආර්තවහරණය ආදී එදිනෙදා ජීවන රටාවේ විවිධ වෙනස්කම් හමුවේ මෙම හෝර්මෝන මට්ටම් නිතර ඉහළ පහළ යයි.යටිබඩේ මහත වැඩිකම හෝර්මෝන බලපෑම් නිසා ද මතුවිය හැකියි. මෙය hormonal belly ලෙස හඳුන්වයි.හෝර්මෝන අසමතුලිතතාවක් ඇතිවීම නිසා හදිසියේම සිරුරේ මෙවැනි තත්වයක් ඇතිවිය හැකියි.මෑතක සිට යටිබඩ නෙරා ඒම සිදුවන්නේ නම් වෛද්‍යවරයෙකු වෙත යොමුවි ඔබේ සෞඛ්‍ය පරික්ෂා කරගන්න.
ආතතිය නිසා ද උදරය නෙරීමට පටන්ගනියි. මෙය ආතතියට සිරුර ප්‍රතික්‍රියා කරන ආකාරයක් ලෙස හඳුන්වන්නට පුළුවන්.දිගුකාලීනව සිරුර ආතතීන්ට නිරාවරණය වීමෙන් සිරුරේ ආතති හෝර්මෝන මට්ටම් ඉහළ යයි. මින් ඇතැම් ඒවා උදරයේ මහත්වීමට (ස්ථූලතාවට) ප්‍රබලව බලපායි.ආතතිය අඩුකරගැනීමට ඔබ වෙනුවෙන් යම් කාලයක් වැය කරමින් නිදහසේ සිටින්න, භාවනා කරන්න, යෝගා සහ ව්‍යායාම වල යෙදෙන්න, මිතුරන් සමඟ සතුටින් කාලය ගත කරන්න.දිනපතා පැය 8-9ක නින්දක් ලබන්න.සෞඛ්‍ය සම්පන්න ආහාර පාන පමණක් පරිභෝජනය කරන්න.
ඔබේ සිරුරේ ස්වභාවික හැඩය නිසා
සිරුරේ හැඩය ප්‍රධාන කාණ්ඩ 3කට බෙදයි.
එන්ඩොමෝර්ෆ් (endomorphs)- ප්‍රමාණයෙන් සුමට, වටකුරු ,විශාල ශරීරයකට හිමිකම් කියන අය. අනෙක් අයට සාපේක්ෂව වර්ධනය වූ මාංශ පේශී හා විශාල මේද ප්‍රතිශතයක් පවතියි.මෙම මේද ඉවත්කිරීම ඉතා අපහසුය.එමෙන්ම ඉක්මනින් මේදය තැන්පත්වීමේ ස්වභාවය ද මාංශ පේශී වර්ධනය ඉක්මන්ය. කාඩියෝ ව්‍යායාම වඩාත් උචිතයි
එක්ටොමෝර්ෆ් (ectomorphs)- කෙසඟ සිරුරකට හිමිකම් කියන අය වේ.මේදය තැන්පත්වීම අවම අතර මාංශ පේශී වල ප්‍රමාණය අඩුය.උරහිස් ප‍ටුය. පපු ප්‍රදේශය පැතලිය .ප්‍රමාණයෙන් කුඩා, තරමක දුර්වල ශරීර රාමුවක් සතුය.පරිවෘත්තිය ක්‍රියාවල වේගය අධික නිසා මාංශ පේශී වර්ධනය කරගැනීම තරමක් අමාරුය. දරාගැනීම වැඩිකරවන (endurance) සහ මාංශ පේශී වර්ධනය කරන වර්ගයේ ව්‍යායාම උචිතයි.
මෙසොමෝර්ෆ් (mesomorphs)-පෙර සඳහන් කළ ශරීර වර්ග දෙකට අතරමැදි ශරීර ස්වභාවය නිරූපණය කරයි.මධ්‍යම ප්‍රමාණයේ රළු ශරීරයකට හිමිකම් කියන අය වේ.හරියට මලල ක්‍රීඩා කරන අයට සමාන මධ්‍යම ප්‍රමණයේ ශරිර රාමුවක් සතුය.හොඳින් වර්ධනය යූ මුර්තිමත් මාංශ පේශී දැකිය හැක.මොවුන්ගේ ශක්තිමත් බව ද වැඩිය.මාංශ පේශි වල ප්‍රමාණය වැඩියි වගේම වර්ධනය කිරීමටද වඩාත් ලෙහෙසිය.
ඒ වගේම ඇතැම් අයට මිශ්‍ර ලක්ෂණ ද තිබිය හැකියි.උදාහරණයක් විදියට,එක්ටො-මෙසොමෝර්ෆ් හෝ එන්ඩො-මෙසොමෝර්ෆ් ශරීර වර්ග දැක්විය හැකියි. ශරීර හැඩයේ ස්වභාවය අනුව ප්‍රතිඵල ලබාගත හැකි ව්‍යායාම ක්‍රම ද වෙනස්වෙයි. එම නිසා නිවැරදි ව්‍යායාම තෝරාගැනීමේදී ඔබේ සිරුරේ හැඩය හඳුනාගැනීම ද ඔබට හොඳ පහසුවක් වේවි.
නිතිපතා ඔබ අනුගමනය කරන ඇතැම් වැරදි ශරීර ඉරියව් ද ඊට බලපෑ හැකියි
නිකට හා බෙල්ල පහළට කරගෙන නැවී සිටීම,කුදුවී සිටගැනීම, ඇවිදීම හෝ වාඩිවීම, වගේ අහිතකර ඉරියව් එදිනෙදා ජීවිතයේ භාවිත වෙනවා.මෙම ඉරියව් උදරයට ඇතිකරවන්නේ සෘණාත්මක බලපෑමකි.විශේෂයෙන්ම අසාමාන්‍ය වගේම ඉතා කැත ලෙස උදරය නෙරීමට පටන්ගත හැකියි.
ඔබේ ශරීර ඉරියව්ව ගැන නිතර අවධානයෙන් ඉන්න. වැරදි ඉරියව් වල සිටින විට ඔබව නිවැරදි කරගන්න උත්සහ කරන්න.සිරුරේ ස්වභාවික ඉරියව්ව ක්‍රමවත් කරවන නම්‍යතා ව්‍යායාම (ස්ට්‍රෙචිං) සහ වෙනත් ව්‍යායාම ක්‍රම ද නිතිපතා අනුගමනය කරන්න.ඉන් ඔබට පැහැදිලි වෙනසක් අත්දැකිය හැකිවේවි. සිරුරේ වේදනා කැක්කුම් සහ දරදඬු බව ඇතිනොවීමට සිටගැනීමේදී, ඇවිදීමේදී, වාඩිවීමේදී ඔබේ ශ්‍රෝණි ප්‍රදේශය නිසි ඉරියව්වෙන් පවත්වාගන්න.
ගර්බනියක්ව සිටීම නිසා
ගර්බනියක් වී සිටීම නිසා උදරය (පෙකණිය ප්‍රදේශ) රැළි වැ‍ටුණු, එල්ලා වැ‍ටුණු ස්වභාවයක් ගත හැකියි. ඇතැම් අයට මෙය බරපතල ගැටලුවක් වී තිබෙයි.මේ තත්වය දුරුකරගැනීමට ව්‍යායාම වල යෙදීම හොඳ සහයක් ලබාදෙයි.කකුල් හරස් කරගෙන බිම වාඩිවිම, මුණින් හැරි අත් කකුල් බිම තබා සිරුර ඉහළට එසවීම හෙවත් ලන්ජස් ක්‍රමය,අත් කකුල් බිම තබා සිටගැනීම හෝ පාලම් ඉරියව්ව උදාහරණ කිහිපයකි.ව්‍යායාම වල යෙදීමට පෙර ඔබේ වෛද්‍යවරයාගෙන් උපදෙස් ලබාගැනීමට සැලකිලිමත්වන්න.
