හෘදයාබාධයක් ඇතිවන්නේ හෘදයට රුධිරය නිසි ලෙස ගලා යාම නතර වූ විට සහ ප්‍රමාණවත් ලෙස ඔක්සිජන් නොලැබීම නිසා හෘද පේශී වලට ආබාධ සිදු වූ විටයි.ක්ෂණික මරණ වලට බලපාන හේතු අතරින් එකක් ලෙස සැළකෙන හෘදයාබාධ සුළු කොට තැකිය නොහැකියි.
හෘද සෞඛ්‍යයේ ආරක්ෂාව හා එහි නීරෝගී ක්‍රියාකාරීත්වය කෙරෙහි එදිනෙදා ජීවන පුරුදු මෙන්ම ආහාර පාන පුරුදු ද බෙහෙවින් බලපායි. පෝෂණයෙන් අනූන සෞඛ්‍යාරක්ෂිත ආහාර පාන හෘදයේ ක්‍රියාකාරීත්වය නීරෝගී කරවයි. ඉන් හෘදයාබාධ ඇතුළු හෘද සෞඛ්‍ය ගැටලු ඇතිවීමේ අවදානම් බොහෝ හොඳින් පාලනය කරගැනීමට ද හැකියි.
වෛද්‍ය විද්‍යාත්මකව අදහස් වලට අනුව හෘදයේ ක්‍රියාකාරීත්වය නීරෝගී කරවන ඇතැම් ආහාර පාන කිහිපයක් ගැනයි මේ.
මේද මාලු-සැමන්, සාඩින්,හුරුල්ලන් වැනි මේද අඩංගු මාලු ඇරිත්මියා (arrhythmia) : හෘද ස්පන්දන වේගයේ හෝ රිද්මයේ අසාමාන්‍යතා ඇතිවීම හා ආතරෝස්ක්ලෙරෝසිස් (artherosclerosis): හෘදයේ රුධිර නාළ තුනීවීම හෙවත් ප‍ටුවීමේ රෝග වර්ධනය වීමේ අවදානම අඩුකරවයි. මෙම මාලු වල හෘදයට හිතකර ඔමේගා-3 මේද අම්ල බහුලයි. ඊට අමතරව සින්ක්, මැග්නීසියම්,යකඩ,කැල්සියම් ඇතුළු ඛනිජ ලවණ මෙන්ම විටමින් වර්ග ද අඩංගුයි.මෙම මාලු වල ඇති විටමින් B2,B12 හා රයිබොෆ්ලැවින් වැනි පෝෂක සංයෝග අස්ථි වලට කැල්සියම් උරාගැනීමට අවශ්‍ය සහය ලබාදෙයි.මීට අමතරව මාලු වල අඩංගු සෙලේනියම් වැනි පෝෂක හෘදයේ නීරෝගී බව වඩවමින් හෘද රෝග ඇතිවීමට එරෙහිව සටන් කරයි. සතියකට දෙතුන් වරක් පමණ ඔබේ ආහාර වේලට මාලු එකතුකරගන්න.
ඩාක් චොකලට්-70%ක් පමණ කොකෝවා අන්තර්ගතයක් ඇති මෙම චොකලට් රුධිර පීඩනය සාමාන්‍ය අතට පත්කිරීම හා එය නියාමනයට අවශ්‍ය සහය ලබාදෙයි.එමෙන්ම සිරුරේ ප්‍රදාහයට එරෙහිව සටන් කරයි. රුධිර කැටිගැසීම වළකයි.ආතතිය වැඩිවීම වළකයි.සිරුර සන්සුන් වීමට උපකාර කරන සෙරටොනින් හෝර්මෝන ස්‍රාවය වැඩිකරයි.රුධිර සීනි මට්ටම් වැඩිවීම පාලනය කරන නිසා අතිරික්ත සීනි අනවශ්‍ය මේද ලෙස තැන්පත්වීම බොහෝ දුරට අවම කරයි.මතක ශක්තිය මෙන්ම සමේ නීරෝගි බවට ද හිතකරයි.
අතිශයින්ම පිරිසිදු ඔලිව් තෙල්-දිනකට ඔලිව් තෙල් හැඳි කිහිපයක් පරිභෝජනය සඳහා එක්කරගැනීම අහිතකර කොලෙස්ටරෝල් හා රුධිර සීනි මට්ටම් පාලනයට උදවු වන බව අධ්‍යයන මඟින් පෙන්වාදෙයි.ඔලිව් තෙල් වල රුධිර පීඩනය අඩුකරවන ඔලෙයික් අම්ල බහුලයි. ඔලිව් තෙල් නොයෙකුත් පිළිකා අවදානම් අවම කරගැනීමට ද ගුණදායි තෙල් වර්ගයක් බව පෙන්වාදෙයි.
නට් වර්ග-නට් වර්ග වල හෘදයට හිතකර ප්‍රෝටීන් හා තන්තු බහුලයි. එමෙන්ම අහිතකර කොලෙස්ටරෝල් මට්ටම් අඩුකරවන විටමින් E ද අඩංගුයි.හේසල් නට්, ආමන්ඩ් වැනි නට් වර්ග ඊට උදාහරණයි.
ඕට්ස්-ඕට්ස් යනු පෝෂණයෙන් අනූන ධාන්‍ය වර්ගයකි.වසර 7000කට පමණ අතීත චීන හා ග්‍රීක ජනයා අතර ඕට්ස් ඉතා ජනප්‍රිය ආහාරයක් ලෙස භාවිත වී තිබෙන බව සඳහන්.වර්තමානයේ ඕට්ස් යනු බොහෝ දෙනා කැමති උදෑසන ආහාර වර්ග අතරින් එකකි.තන්තු බහුල ආහාරයක් නිසා සිරුරේ අහිතකර කොලෙස්ටරෝල් මට්ටම් අඩුකරයි. ආහාර ජිර්ණය වැඩිදියුණු කරමින් අනවශ්‍ය ලෙස සිරුරේ මේද තැන්පත්වීම වළකයි.බර අඩුකරයි. ඕට්ස් විටමින් හා ඛනිජ ලවණ වලින් අනූන ආහාරයකි.
ග්‍රීන් ටී-හරිත තේ හෙවත් ග්‍රීන් ටී වල අඩංගු ජෛව සංඝටක හෘද සෞඛ්‍ය වඩාත් නීරෝගී කරවයි.ප්‍රතිඔක්සිකාරක බහුල නිසා හෘදයේ පේශී හා නාළ හානිකර මුක්තකණ්ඩ හානි වලින් ආරක්ෂා වේ.මේද දහනක ගුණය වැඩි නිසා සිරුරේ තැන්පත් ව ඇති මේද සිරුරෙන් ඉවත්වීම වේගවත් කරයි.දිනකට කෝප්ප 1ක් බැගින් පානය කිරීම කොලෙස්ටරෝල් වැනි මේදමය ද්‍රව්‍ය හෘදයේ ධමනි හා නාළ තුළ තැන්පත්වීම හා ඒවා තුළ අවහිරතා ඇතිවීමේ අවදානම වළක්වන බව අධ්‍යයන මඟින් පෙන්වාදේ.
නිවිති-කොළ පැහැති පත්‍ර සහිත එළවළු වල විටමින් ,ඛනිජ ලවණ මෙන්ම ප්‍රතිඔක්සිකාරක ද බහුලයි.ඒවා මඟින් හෘදය සක්‍රීය කර රුධිර පීඩනය යථා තත්වයට පත්කරවයි. තන්තු බහුල නිසා මේද තැන්පත් වීමේ අවදානම අවම කර ජීර්ණය වඩවයි.සිරුරේ විෂහරණය කරයි.හෘදයට හිතකර මැග්නීසියම්, පොටෑසියම්,මැංගනීස්,යකඩ හා කැල්සියම් නිවිති වල බහුලයි.එමෙන්ම විටමින් A,C,B6 වැනි පෝෂක ද අඩංගුයි.හෘදයේ පීඩනය ස්ථායි කර පේශී ශක්තිමත් කරවයි.
අලිගැට පේර-අලිගැට පේර වල හෘද සෞඛ්‍යයට හිතකර අසංතෘප්ත මේද බහුලයි. මෙහි අන්තර්ගත පෝෂක ගුණ අහිතකර කොලෙස්ටරෝල් මට්ටම් අඩුකර ධමනි තුළ ඇති අවහිරතා ඉවත් කර ඒවායේ මාර්ග පැහැදිලි කරයි.හිතකර මේද වලට අමතරව විටමින් C,B5,B6,E,K ෆොලේට් ඇතුළු පෝෂක ද ඇත.රුධිර සීනි මට්ටම් නියාමනයට, බර අඩුවීමට, මේද තැන්පත් වීම වැළැක්වීමට හිතකර ප්‍රතිඵල ලබාදෙන තන්තු ද බහුලව ඇති පලතුරකි.
දෙළුම්-හෘදයට හිතකර ප්‍රතිඔක්සිකාරක ගුණ බහුල පලතුරක් වන දෙළුම් ආහාරයට ගැනීමෙන් රුධිර පීඩනය අඩු වීම,රුධිර සංසරණය ක්‍රමවත් වීම, හිම්ග්ලොබින් මට්ටම් වැඩිවීම වැනි ප්‍රතිලාභ ද ලැබෙයි.රුධිර නාළ තුළ මේදමය ද්‍රව්‍ය බැඳීම පාලනය කරයි.ධමනි පිරිසිදු කරයි.විටමින් C හා පොලිෆෙනෝල් බහුල නිසා නයිට්‍රික් ඔක්සයිඩ් නිපදවීම උත්තේජනය කර රුධිර ප්‍රවාහය අඛණ්ඩව සිදුවීමට හා ධමනි විවෘතව තබාගැනීමට උපකාරී වන බව විද්‍යාඥයයින්ගේ මතයකි.
සුදුලූනු-ඔබේ ධමනි ස්වාභාවිකව පිරිසිදු කිරීමට පහසු ක්‍රමයක් නම් සුදුළූණු ඔබේ ආහාර වේලට ඇතුළත් කර ගැනීමයි. පර්යේෂකයන් සොයාගෙන ඇත්තේ නිතිපතා සුදුළූණු ආහාරයට ගැනීමෙන් මහාධමනිය ඝන වීම වැළැක්විය හැකි බවයි.සුදුළූණු මඟින් LDL කොලෙස්ටරෝල් මට්ටම අඩු කිරීමෙන් ඔබේ ධමනි වල සෞඛ්‍ය වැඩි දියුණු කරයි. දිනපතා අමු සුදුළූණු බිකි 3- 4 ක් ආහාරයට ගන්න. ආහාර පිසීමේදී සුදුළූණු ඊට එක්කරගන්න .ඔබ සුදුළූණු රසයට අකමැති නම් ඔබට සුදුළූණු අතිරේකයක් උත්සාහ කිරීමට ද පුළුවන. ආහාරමය අතිරේක ගැන උපදෙස් සඳහා සැමවිටම ඔබේ වෛද්‍යවරයා හමුවන්න.
